..................................work lama la bro.....

GURINDAM YANG TAK DO NGAN YANG TAK DO LAIE….

Pagi haghi, suboh golap, bumin
Dogheh bongka, tido tak beghapo suki amek tido malam tadi
Kepisat-pisat’an, ambik tukok sekojap
Den jongok kek tingkap matohaghi warno meghah Iyo ko ni?
Kengkawan tido membungkang tu ha – bekoghuh!

Tak do laie do bunyi ayam, itik, kucing, kambing, lombu, kobau, bughung kuang, mughai…
Tak do laie do sogho Wan Aji, Induk Mon, Tam Soyah, Ongah Boka, Uwok Dahlan, Tam Said, Udo sidi, Manap Bai menyapo…- Moh dogheh poie motong!

Yang ado cumo bunyi moto, kegheto, LRT – membising yo tak ghonti-ghonti..

Yang ado cumo sogho Azzam Bellamy, Haji Mazlan, Awie, Ise, Buyea, Ateng, Wan Selama, Mursyid, Mat yie, John, Inger Meyer, Cheb Ali dan jugak sogho Siti, Farah, Atie, Tasha, Sheela, Hanim, Ina, Sofia,Ell, kan? – Sogho orang-orang kelumpo, sogho budak manjo-manjo ni la…

Lamo duduk temonung pulak dah ha’..
Porut den dah ko bulur Yang ado cumo sandwich, burger, kontang goreng, chicken chop, steak, nasi lomak pun dah tah apo ghaso’eh..tak samo cam omak den buek

Tak do laie do ubi ghobuih, mee loka, cekodok, lempeng, goreng topung, samba kundang, samba kelambir..umak ia soda pee, sumo ando lako

“ Tu la kau Jang, Yo omak sughuh kau balik kau tak maun, macam-macam alasan kau boghi- Tongka tak maun donga koba oghang, gasak yo laie”..

“Iyo la mak, sok ese balik toksah la gaduh..”

Yarapak paneh he’ tongahari ni..mendidih kepalo otak, sesajo yo den nak mendodah kek tongah pokan kelumpo ni…

Yang ado cumo KLCC, Time Square, Lot 10, Sungai Wang, Sunway Pyramid, One Utama, Mid Valley..
Tak do laie do kodai Ulung Sarip,Kodai Suman, Kodai Cino Ali, Kodai Atai, Cino Gomok Simpang Tanjung, Kodai Manap Teh…

Kek seboghang jalan nun ando pulak bunyi orang pasang CD lagu Hip-hop bukan main kuek..sampai nak pocah speaker..muzik bebudak modu-mudo jam ni..

Tak do laie do lagu kugiran, joget lambak kek ghumah kendughi kawin, cak lempong, bongai, bunyi kompang pun lansung haram nak dapek donga...

Yang ado bunyi lagu orang becakap yo, Tang mulo sampai habih...tah apo yang repek e' macam Jay-Z, Beyonce, Pussycat Dolls, Usher, Akon, alah....macam dalam clubbing tu la, Zouk, Rum Jungle, The Loft, Modesto's, Aloha...........tompek oghang mudo-mudo mengokeh!

Hai , ontah la mak, oghang kemain ghamai eh’ ha..tompi pait kok kono apek’an…

Haghi dah sonjo, badan pulak dah ponek, lotih litak
Buek apo yo ekau nak melangok kek sini yo laie, moh la dogheh balik- Balik mano Jang? Kampong ko?

Tak la hai.. Balik kek ghumah bujang den la, takkan nak balik kampung, sokgi kojo...
Esok tah apo pulak conto’e...
Samo yo ko macam haghi ni?
Ontah lah mak, nak buek camno Te’ uwan den maghin den lahir kek colah pokok gumbio

Ontahkan iyo ontahkan tidak Pembongak uwan den pembongak la den..

* tak da apa nak buat malam semalam gua pun buat gurindam ni buat tatapan kawan2 juga buat nenek gua yang telah meninggal dunia tahun lepas.....

Bukit Kerinchi 18 mei 2005.